Цуцули повторно во Шкендија: Верувам дека ќе ја вратиме шампионската титула
Денеска фудбалскиот прволигаш Шкендија ја информираше јавноста дека нов играч на клубот е Ардијан Цуцули (35).
Искусниот одбранбен фудбалер потпиша договор на една година со тетовските „црвено-црни“ со кои ги имаше и најголемите успеси во кариерата.
После четири години Цуцули се враќа во Шкендија, за оваа екипа настапуваше во периодот од 2015 до 2018 година. Со тетовскиот тим двапати беше шампион на Македонија, а има и по еден трофеј во националниот Куп и Суперкуп.
Пред да се врати во клубот, играше во Албанија за Кукс и во Косово за Дрита. Во кариерата беше дел и од Партизани Тирана, Велазерими, Победа и Милано од Куманово. Запиша и шест настапи за македонската А репрезентација.
– Кога станува збор за Шкендија, нормално секое враќање е емотивно. Духовно сум поврзан со Шкендија бидејќи најславните години во кариерата ги поминав како фудбалер носејќи го дресот на Шкендија. Еве се враќам во мојот дом, тука имам и соиграчи со кои во минатото игравме заедно во Шкендија. Со Шкендија првпат бевме прогласени за шампиони во 2011 година и верувам дека оваа година заедно ќе ги оствариме нашите цели и ќе ја вратиме шампионската титула – рече Цуцули за клупскиот сајт.
