Чувар во уметничка галерија нацртал очи на слика вредна милион долари, му било здодевно
Чувар во руска уметничка галерија вандализирал авангардна слика позајмена од најголемото уметничко складиште во земјата, со тоа што нацртал очи на фигури кои намерно се претставени без црти на лицето на сликата. За среќа, реставраторите велат дека штетата може да се санира, пишува Би-би-си.
Центарот „Елцин“ во Екатеринбург соопшти дека вандалскиот напад на сликата „Три фигури“ на Ана Лепорска се случил на 7 декември. Се наведува дека осомничениот виновник работел во приватна фирма која ја обезбедувала галеријата.
Сликата, која датира од 1930-тите, прикажува три глави со коса, но без црти на лицето. Стражарот решил со хемиско пенкало да нацрта очи на двете лица. Центарот Елцин објави дека сликата е испратена на реставрација во Државната Третјаковска галерија во Москва.
Рускиот информативен сајт РБК објави дека е покрената кривична постапка по обвиненија за кои се заканува казна затвор до три месеци. Сликата наводно вредела 74,9 милиони рубли (приближно еден милион долари).