Ракометниот клуб Вардар 1961 во вторник го започнува настапот во Европската лига на ЕХФ, а за прв противник во СЦ „Јане Сандански“ – Скопје со почеток од 18.45 часот го има Сесвете од Хрватска во рамките од групата „Ф“.

Своите очекувања за претстојниот дуел на денешната прес-конференција ги сподели тренерот на Вардар 1961, Иван Чупиќ кој порача за екипата оди чекор по чекор, но со големи амбиции и јасна цела – да стигне што подалеку во Европа:

– Вардар секогаш има победнички аспирации, без разлика каде игра. Ова е клуб со голема историја и знаеме дека мора да испорачаме резултат. Сесвете е млад и борбен тим, но ние играме дома, пред нашата публика, и тоа мора да биде предност. За нас е најважно да започнеме со победа, да собираме бодови и да одиме нагоре – истакна Чупиќ.

Тој додаде дека македонската Суперлига е моментално најизедначена во регионот, со многу силни тимови и неизвесни натпревари, што според него го подготвува Вардар за европските предизвици.

– Самодовербата расте, екипата добива облик, а секој меч е нова можност да покажеме што значи да се носи овој дрес – додаде хрватскиот стратег.

Скопските „црвено-црни“ ја бараат поддршката од навивачите и љубителите на ракометот, билети за споменатиот натпревар има онлајн на следниот линк ТУКА, а воедно можете да купите билети и пред главниот влез на салата, секој ден од 10.00 до 17.00 часот.