На денешната седница на пратеничката група на Социјалистичката партија, албанскиот премиер Еди Рама реши да направи измени во владиниот кабинет, објави „Вокс њуз“.

Од кабинетот „Рама 4“ заминува вицепремиерката и министерка за инфраструктура и енергетика Белинда Балуку, која е под истрага на Специјалното обвинителство за корупција и организиран криминал (СПАК). На нејзино место како вицепремиерка доаѓа досегашната министерка за внатрешни работи, Албана Кочиу.

Со новоформираното Министерство за инфраструктура и енергетика ќе раководи Енеа Каракачи. Поранешниот амбасадор на Албанија во Европската Унија, Ферит Хоџа, е именуван за министер за Европа и надворешни работи, позиција што досега ја извршуваше Елиса Спиропали.

Бесфорт Ламалари ја напушта функцијата министер за правда и преминува на чело на Министерството за внатрешни работи, додека Тони Гогу го презема ресорот правда. Промени има и во одбраната – Пиро Венгу заминува од министерската функција, а на негово место е назначен Ермал Нуфи.

За министерка за односи со Парламентот е поставена Ерјона Исмаили.

ВИДЕО | Хаос во Тирана: демонстранти фрлаат молотови коктели врз зградата на владата – полицијата возвраќа со солзавец и со водени топови