ВИДЕО | Хаос во Тирана: демонстранти фрлаат молотови коктели врз зградата на владата – полицијата возвраќа со солзавец и со водени топови
По инцидентите пред владината зграда во Тирана, демонстрантите, заедно со опозицискиот лидер Сали Бериша, продолжија кон зградата на парламентот, каде што два часа се судираа со полицијата.
Албанската полиција денеска употреби водени топови и солзавец за да ги растера новите протести на опозициските десничарски демонстранти, кои фрлаа огномети и домашно направени молотови коктели, објави „Франс 24“.
Препорачано
Илјадници поддржувачи на Демократската партија (ДП) на поранешниот премиер Сали Бериша првин се собраа пред зградата на Владата, барајќи социјалистичкиот премиер Еди Рама да поднесе оставка.
– Ќе ја спасиме Албанија од Еди Рама, кој ја турна земјата во сиромаштија и корупција. Тој е само политички мртовец – изјави 81-годишниот Бериша пред толпата.
Но, Бериша набргу мораше да го прекине говорот откако дел од демонстрантите фрлаа огномети и молотови коктели кон владината зграда. Полицијата употреби солзавец и водени топови за да ја растера толпата.
Полицијата се судри со демонстрантите, летаа молотови коктели
Потоа, Бериша ги поведе демонстрантите кон зградата на парламентот, каде што беа пресретнати од полицијата, вклучително и специјални единици за разбивање нереди.
Полицијата и демонстрантите околу два часа се судираа по улиците околу парламентот.
Според полицијата, уапсени се околу 30 луѓе. Демократската партија тврди дека биле приведени околу 40 нејзини поддржувачи.
Министерката за внатрешни работи Албана Коџиу го осуди „вандализмот“, оценувајќи во објава на социјалните мрежи дека нападот врз полицијата е „кривично дело“.
Ова е секојдневие во Албанија
Албанската политика честопати е обележана со жестоки кавги во и надвор од парламентот меѓу левичарските и десничарските партии, кои редовно меѓусебно се обвинуваат за корупција и поврзаност со организиран криминал.
Тензиите повторно се зголемија од ноември, кога вицепремиерката Белинда Балуку, блиска соработничка на Рама, беше суспендирана поради корупциски скандал што сè уште е под истрага.
Обвинета за доделување инфраструктурни договори, Балуку ги отфрли обвинувањата на обвинителството.
Неколку поранешни министри од владите на Рама, исто така, се на удар на антикорупциски истраги.
И Бериша беше обвинуван дека доделувал јавни договори на блиски соработници додека бил на власт, но тој ги негира обвинувањата.
Борбата против корупцијата во Албанија е посебен фокус на Европската Унија во рамки на пристапните преговори со владата во Тирана.
Протест во Тирана: Судир меѓу полицијата и демонстрантите пред зградата на Владата
