Вечерва во Лигата на шампионите се играат првите реванш-натпревари од плејофот за место во осминафиналето, а од четирите средби што се на програмата, најмногу внимание привлекува дуелот во Милано, каде што Бодо/Глимт гостува со предност од 3-1 од првиот натпоревар.

На северот на Европа, Бодо одигра одличен натпревар и си обезбеди солидна предност пред гостувањето во Милано. Сепак, норвешкиот стратег Кјетил Кнутсен порачува дека неговиот тим нема намера да се брани.

„Не смееме да мислиме само на одбраната. Подобро е да излеземе како резултатот да е 0:0, наместо да се повлечеме предлабоко. Потребен ни е баланс, ако сме премногу дефанзивни, ќе се откажеме од контранападите. Сите мора да учествуваат во одбраната, но и заедно да напаѓаме. Тоа е нашиот начин на размислување“, изјави Кнутсен.

Од другата страна, Киву на клупата на Интер е свесен дека неговиот тим мора да покаже сосема поинакво лице ако сака да остане во елитното натпреварување.

„Можевме да направиме повеќе и разочарувањето е големо. Сепак, успеавме да се ресетираме. Сега сум фокусиран на нашиот пристап и самодоверба да бидеме најдобрата верзија од себе и да веруваме дека можеме да ја свртиме ситуацијата“, порача Киву.

Лига на шампиони, реванш-натпревари од шеснаесетина финалето:

Реванш плејоф натпревари:

18:45: Атлетико Мадрид – Клуб Бриж (3-3)

21:00 Интер – Боде (1-3)

21:00: Баер Леверкузен – Олимпијакос. (2-0)

21:00: Њукасл – Карабах (6-1)