Чесите славеа над Израел и обезбедија осминафинале на ЕП
Кошаркарите на Чешка го победија Израел во Прага со 88:77 со што го освоија четвртото место во групата Д и обезбедија пласман осминафиналето на Европското првенство.
Двете репрезентации настапите во групната фаза ги завршија со две победи и три порази, но Израел си оди дома поради поразот во вечерашниот натпревар, а Чешка во осминафиналето ќе игра против Грција која е прва во групата Ц.
Чесите постојано беа во водство, на полувремето имаа плус 16, но Израелците не се предадоа и во третата четвртина дојдоа до минус два, но немаа сили за целосен пресврт.
Хрубан постигна 25 поени, Саторански беше одличен и блиску до трипл-дабл со 14 поени, 11 асистенции и осум скока, а Весели додаде 16 поени. Кај Израел најдобри беа Џем Мадар со 16 поени, Џинат постигна 15 поени, а Авдија и Менко по 12 поени.
Грција предводена од Јанис Адетокумпо без проблеми со 90:69 ја совлада Естонија и го освои првото место во групата Ц. Кошаркарот на Милвоки бакс вообичаено беше прво име на натпреварот со 25 поени, додека Слукас даде 11 поени.