Поп-ѕвездата Бритни Спирс ги продала правата за целиот нејзин музички каталог на независната музичка компанија „Примари вејв“, објави „Би-би-си“.

Според информациите, договорот бил склучен на 30 декември, а вредноста се проценува на околу 200 милиони долари (146 милиони фунти). Точната сума официјално не е потврдена.

Спирс (44) е една од најпродаваните пејачки на сите времиња, со повеќе од 150 милиони продадени носачи на звук ширум светот. Во нејзиниот каталог се вклучени девет студиски албуми и хитови како „… Baby One More Time“, „Oops! … I Did It Again“, „Toxic“ и „Gimme More“.

„Примари Вејв“ досега има откупено права и од музичките каталози на ѕвезди како Наториус, Принц и Витни Хјустон. Компанијата е основана пред 20 години од музичкиот извршен директор Лоренс Местел.

Во последните години сè повеќе големи музички имиња ги продаваат своите каталози. Брус Спрингстин го продаде својот на Сони за 500 милиони долари, додека Џастин Бибер потпиша договор вреден околу 200 милиони долари со „Хипгносис сонгс капитал‘“. Слични потези направија и Џастин Тимберлејк и Шакира.

Продажбата на каталогот на Спирс доаѓа по турбулентен период во нејзиниот живот. Во 2021 година таа стави крај на 13-годишното старателство под кое нејзиниот татко имаше контрола врз нејзините финансии и лични одлуки. Во 2023 година ја издаде својата мемоарска книга „Жената во мене“ (The Woman in Me), во која отворено зборува за тој период.

Во јануари 2024 година, Спирс изјави дека „никогаш нема да се врати во музичката индустрија“. Нејзината последна музичка соработка беше дуетот со Елтон Џон во 2022 година.

Деталите од договорот засега не се јавно објавени, а ниту од „Примари вејв“ ниту од тимот на Спирс не дадоа официјален коментар.

ФОТО | Бритни Спирс за родителите: „Тие никогаш нема да преземат одговорност за тоа што ми го направија“