Членовите на британското кралско семејство не добиваат класична плата како повеќето вработени. Наместо тоа, нивните трошоци се покриваат преку комбинација од јавни средства, приходи од приватни имоти, како и преку лично наследство и инвестиции.

Вкупната вредност на британското кралско семејство се проценува на повеќе милијарди евра. Иако формално не поседуваат објекти како Бакингемската палата, тие располагаат со приватни портфолија од недвижности, уметнички дела, накит и други вредни средства, со што ја одржуваат својата лична нето-вредност на мултимилионско ниво.

Начинот на финансирање зависи од статусот на секој поединец, особено од тоа дали има улога на т.н. „работен“ член на кралското семејство.

Што е „Sovereign Grant“ и како функционира?

Главниот механизам за финансирање на монархијата е „Sovereign Grant“ – годишна исплата од државниот буџет наменета за покривање на официјалните должности на монархот. Со овие средства се одржуваат палатите што се користат, се финансираат службените патувања и јавните ангажмани. Според достапните информации, во фискалната 2026/2027 година, „Sovereign Grant“ би требало да се зголеми за околу 60 милиони долари.

Покрај тоа, одредени членови на кралското семејство остваруваат значителни приходи од војводства – големи наследни земјишни поседи кои носат милионски приходи на годишно ниво. Овие средства се користат за приватни, службени и хуманитарни трошоци, а често ги покриваат и трошоците на други работни членови на семејството.

На пример, војводството Ланкастер, кое му припаѓа на кралот Чарлс Трети, според официјалните податоци служи главно за покривање на трошоците на останатите членови на кралското семејство.

Иако кралските финансии се сложени и делумно нетранспарентни, постојат доволно податоци за да се добие приближна слика за тоа кои членови се најбогати и кои не добиваат службени средства.

Крал Чарлс Трети

На врвот на листата очекувано е кралот. Според листата на најбогати поединци во Обединетото Кралство за 2025 година, објавена од „The Sunday Times“, нето-вредноста на кралот Чарлс Трети се проценува на околу 736 милиони евра.

Неговиот годишен приход од војводството Ланкастер во 2025 година изнесувал приближно 28,1 милион евра, според официјалните податоци.

Принц Вилијам

Откако во 2022 година неговиот татко стапи на престолот, принцот Вилијам ја презеде титулата принц од Велс, како и управувањето со војводството Корнвол. Приходите од овој обемен имот во 2025 година достигнале осумцифрени суми, само малку пониски од оние на кралот Чарлс.

Според годишниот извештај, Корнвол остварил вишок од околу 26,3 милиони евра. Кога неговиот син, принц Џорџ, еден ден ќе стане прв во редот за престолот, војводството ќе премине во негова сопственост.

Принц Едвард, војвода од Кент

Деведесетгодишниот принц Едвард, прв братучед на покојната кралица Елизабета II и војвода од Кент, е еден од најстарите активни членови на кралското семејство. Со децении примал средства од Sovereign Grant (претходно Civil List) за покривање на трошоците поврзани со неговите службени должности.

Според истражување на „Гардијан“ од 2023 година, тој во текот на животот примил околу 20,7 милиони евра службени исплати. Со оглед на тоа што неговата служба трае уште од 1960-тите, оваа сума е релативно мала во споредба со годишните приходи на Чарлс и Вилијам.

Принцеза Ана

Истото истражување проценува дека принцезата Ана, ќерка на кралицата Елизабета II, во текот на 51 година службени обврски примила околу 19,1 милион евра. Тоа значи дека нејзините просечни годишни трошоци, вклучувајќи персонал и патувања, изнесувале околу 374 илјади евра.

Позната како највредниот и најактивен член на кралското семејство, Ана учествувала на повеќе од 11.000 службени настани меѓу 2002 и 2022 година – далеку повеќе од повеќето други членови.

Принц Едвард, војвода од Единбург

Братот на кралот Чарлс и на принцезата Ана, принцот Едвард, војвода од Единбург, според проценките на „Гардијан“, од 1982 година наваму примил околу 7,5 милиони евра од службени извори. Тоа значи дека годишно добивал околу 200 илјади евра за покривање на службените трошоци.

Принц Хари и Меган Маркл

Принцот Хари и Меган Маркл не примаат средства од Sovereign Grant од 2020 година. Додека Хари бил активен член на кралското семејство, бил финансиран преку војводството Корнвол и Sovereign Grant, исто како и неговиот брат.

По повлекувањето од кралските должности, двојката одлучи да ги прекине финансиските врски со монархијата. Во официјалното соопштение од 2020 година истакнаа дека средствата од Sovereign Grant покривале само мал дел од нивните трошоци и дека имаат намера да станат финансиски независни.

Ендру Маунтбатен-Виндзор

Ендру Маунтбатен-Виндзор, поранешниот војвода од Јорк, примал средства од Sovereign Grant од 1978 до 2019 година, во вкупен износ од околу 14,8 милиони евра, според The Guardian. По повлекувањето од јавниот живот и откажувањето од кралските должности во 2019 година, престанал да добива службени финансиски средства.