Остриот пад на наталитетот во голем број земји, без оглед на нивниот економски развој, може да доведе до сериозни демографски последици и да го загрози опстанокот на човештвото на долг рок, предупреди британскиот писател, демограф и публицист Пол Морланд во интервју за „Neue Zürcher Zeitung“- пренесе Политика.

Морланд оцени дека трендот на ниски стапки на наталитет повеќе не може да се гледа како проблем на поединечните богати земји, туку како глобален процес што ги засега и развиените и посиромашните земји. Како еден од најдрастичните примери, тој ја наведе Јужна Кореја, земја која со години има една од најниските стапки на наталитет во светот. Според јужнокорејската статистика, стапката на фертилитет во таа земја паднала на 0,72 деца по жена во 2023 година, што е далеку под нивото потребно за едноставна репродукција на населението.

„На секои 100 Јужнокорејци родени денес, околу 40 ќе се родат во следната генерација, а само 16 во генерацијата потоа. За две генерации ќе изгубиме 84 проценти од населението, а потоа уште 84 проценти, што ќе заврши катастрофално“, рече Морланд.

Тој додаде дека човештвото сè уште не ја поминало точката од која нема враќање, но предупреди дека сегашните трендови не можат да се игнорираат. Според него, верувањето дека намалувањето на населението само ќе ја „врати планетата во претходната состојба“ и нема да предизвика длабоки економски и социјални превирања е погрешно.

ВИДЕО | Го прашаа Обама дали има вонземјани: „Да“, одговори тој и предизвика лавина реакции

Морланд ја наведе Јапонија како особено предупредувачки пример. Во 1960 година, таа земја имала околу 100 милиони жители; до 2010 година, населението пораснало на околу 130 милиони, додека до средината на векот се очекува нов пад. Проблемот, истакна тој, не е само во вкупниот број на луѓе, туку и во старосната структура на населението.