Поранешниот бразилски претседател Жаир Болсонаро во понеделникот пред судот во Бразилија изјави дека „паранојата“ предизвикана од лекови го навела да се обиде да ја отстрани електронската алка за нога што ја носел во домашен притвор, според документ до кој имал увид „Ројтерс“.

На рочиштето, Болсонаро негираше каква било намера да избега од домашен притвор или да го отстрани микрочипот во алката. Тој рече дека се обидел да го отстрани со лемило затоа што имал „халуцинација“ дека има жица во него.

Судијата на Врховниот суд, Александар де Мораес, нареди поранешниот претседател да биде приведен во вторник, пред планираниот митинг на поддржувачи пред неговиот дом. Судот смета дека настанот можел да го загрози полициското следење на домашниот притвор.

Полицискиот извештај покажува дека електронската алка за нога, или монитор за глужд, бил оштетен, објави Танјуг.

Болсонаро, осуден на 27 години затвор за обид за државен удар, беше приведен откако се обиде да ја скрши алката што мораше да ја носи од август додека беше во домашен притвор.