Боки 13: Првата средба со Силјан Мицевски ја договори Кирацовски
За некои правни акти и документи на „Меѓународниот сојуз” не само јас, туку се потпишуваа и лица за кои денес може да кажам дека некои се обвинети, а некои сведоци, нешто што јас го толкувам како притисок врз мене. Јас како симпатизер на СДСМ и Шарената револуција не сум имал средби само со Фросина Ременски, туку и со повисоки функционери, рече денеска во судница Бојан Јовановски првообвинет во случајот „Меѓународен сојуз”.
За случајот „Меѓународен сојуз” обвинети се Бојан Јовановски-Боки 13, Јасна Мандиќ, Фросина Ременски, Миле Јовановски и Христина Блажеска за кривичните дела „измама” и „перење пари”. Судскиот процес го води судијката Софче Гаврилова-Ефремова.
– Првата средба со Силјан Мицевски ја организираше Александар Кирацовски. Имавме потпишано меморандуми за соработка со општините Охрид, Битола, Карпош и Дојран. Татко ми Миле само еднаш има влезено во „Меѓународен сојуз”, а сега овде го гледаме како обвинет. ОЈО потфрли во овој случај. Лага и невистина е дека се уплаќале пари од „Меѓународен сојуз” во 1ТВ – рече Јовановски.
Тој нагласи дека нема земено ни денар од Буџетот на државата и бил горд на тоа.
– Мојот договор со Г.П. “Пелистер” не падна од небо туку беше преку посредници, а вистиниските посредници ќе се дознаат преку кривичните пријави. Мила Царовска ја донесе Лилјана Тодоровска која е автор на проектот кај мене. Имав и прием и поддршка од Зоран Заев и од Оливер Спасовски – рече Јовановски.
На минатото рочиште во воведните зборови обвинителката Вилма Рускоска рече дека ќе докаже оти обвинетите свесно ги сториле делата и дека од почетокот оваа организација е темелена на лаги, за да им се извлечат пари на бизнисмените Силјан Мицески и Ардијан Амзоски. Обвинетите, пак, се изјаснија дека не чувствуваат вина за делата кои им се ставаат на товар. Според обвинението, обвинетите ги измамиле бизнисмените Силјан Мицески и Ардијан Амзоски дека ќе учествуваат во проект преку „Меѓународен сојуз” на Бојан Јовановски-Боки 13 и ги оштетиле со повеќе од милион евра.
Не сум измамила никого, тврди Ерцеговиќ обвинета во аферата „Меѓународен сојуз”