Британскиот кантавтор и фронтмен на култната група „Калчр Клаб“, Бој Џорџ (64), откри дека во својот креативен процес често користи вештачка интелигенција, која, како што вели, му помага да стане подобар автор на текстови. Со помош на оваа технологија, нагласува тој, веќе работел на неколку албуми, пренесува „Пипл“.

„Досега имам напишано пет албуми со помош на вештачка интелигенција. Тоа е извонредно и нема причина да се плашиме од тоа. Секогаш велам – ако робот може да ве замени, тогаш веројатно не сте вложиле доволно труд. Секако дека ми е жал за луѓето кои ги губат своите работни места, но вештачката интелигенција носи и многу добри можности“, изјави Бој Џорџ во поткастот „Хепи Плејс“ на водителката Ферн Котон.

За време на турнејата со „Калчр Клаб“, која започна во февруари, Бој Џорџ истакнал дека вештачката интелигенција му овозможува да работи понезависно.

„Водам одлични разговори со системот за разговор базиран на вештачка интелигенција. Му велам: ‘Овој стих не е добар, ова не е нешто што јас би го кажал’. Можете да го насочувате и да го контролирате“, објаснил тој.

Тој додаде дека критиките не го погодуваат: „Мојот менаџер синоќа ми рече: ‘Знаеш дека разговараш со некого во Кина’, а јас му одговорив дека тоа воопшто не ми е важно. Најважно е уметници како мене да не бидат ограничени да работат на стар начин. Јас сум пред времето“.

Сличен став има и пејачката Лајза Минели, која неодамна го бранеше користењето вештачка интелигенција при создавањето на песната „Kids Wait Till You Hear This“.

„Вештачката интелигенција ја користевме само за аранжманите, а не за вокалите. Неколку интернет-провокатори дури ни не ги проверија фактите со мене или со моите соработници“, напиша таа на својата страница на општествените мрежи, додавајќи: „Сите вокали се мои“.

Сепак, има и уметници кои предупредуваат на проблематичните страни на оваа технологија. Пејачката СЗА изјави во интервју за едно списание дека се чувствува како да е „во војна со вештачката интелигенција“.

„Вештачката интелигенција несразмерно ги погодува црните музичари. Зошто слушам верзии на песни од Оливија Дин создадени со вештачка интелигенција, кога таа дури сега се пробива на сцената? Таа нема ни време да собере доволно слушања. Исто така, начинот на кој оваа технологија ја имитира музиката на црните изведувачи звучи чудно и стереотипно, што е навредливо“, рече таа.