Биткоинот, кој минатата година достигна историски високи нивоа, во последните месеци се соочи со силен пад и повторно ја отвори дилемата кај инвеститорите – дали станува збор за привремена корекција или за подлабока промена на криптопазарот. Најголемата криптовалута падна под границата од 60.000 долари, што претставува намалување од повеќе од 50 проценти во однос на рекордот од околу 128.000 долари достигнат во октомври 2025 година- пишува Еуроњуз.

Падот доаѓа во период кога американските берзи бележат силни резултати, што покажува дека криптовалутите повеќе не се движат секогаш во ист правец со другите ризични инвестиции. По враќањето на Доналд Трамп во Белата куќа, криптоиндустријата очекуваше нов период на раст. За време на кампањата во 2024 година, Трамп најави дека САД ќе ги претвори во глобален центар за криптовалути, што предизвика голем оптимизам меѓу инвеститорите. Очекувањата за полесна регулатива и поповолен однос од американските регулатори помогнаа биткоинот да достигне нови рекорди. Во годината по изборите, неговата вредност се зголеми за повеќе од 80 проценти.

Сепак, почетниот ентузијазам не траеше долго. Наместо продолжување на растот, пазарот влезе во период на неизвесност и силен притисок. Според анализите на финансиските институции, падот не е само краткорочна реакција, туку резултат на повеќе фактори.

Една од главните причини е промената во очекувањата за политиката на американската централна банка. Инвеститорите очекуваа побрзо намалување на каматните стапки, но постојаната инфлација создаде притисок Федералните резерви да останат повнимателни. Дополнителен удар за криптопазарот претставуваше и одливот на капитал од биткоин-фондовите (ETF), како и промената во однесувањето на институционалните инвеститори. Во исто време, дел од инвеститорите го насочуваат капиталот кон секторот на вештачка интелигенција, кој во последниот период привлекува огромен интерес и вложувања.

И покрај политичката поддршка и поголемото институционално присуство, криптовалутите и понатаму остануваат високо ризични средства. Биткоинот сè уште нема широка употреба како класично средство за плаќање, а неговата вредност во голема мера зависи од расположението на инвеститорите и очекувањата за идниот раст. Дополнителен притисок создаде и промената на стратегијата на компанијата Strategy (поранешна MicroStrategy), еден од најголемите корпоративни сопственици на биткоин, која почна да отстапува од долгогодишната политика на задржување на своите резерви.

И покрај падот, дел од аналитичарите сметаат дека долгорочната перспектива за криптосекторот останува позитивна. Експертите посочуваат дека поддршката од политичкиот и финансискиот сектор може да продолжи да ја зголемува побарувачката за дигитални средства. Сепак, најголемото прашање останува дали инвеститорите повторно ќе стекнат доверба и дали биткоинот ќе успее да најде нова сила за раст. По уште еден голем пад, криптопазарот повторно испраќа порака дека високите приноси секогаш доаѓаат со високи ризици.

Биткоинот падна на 62.000 долари, на половина од највисоката вредност од 126.000 долари