Цените на нафтата нагло пораснаа на светските пазари, при што суровата нафта брент се искачи до речиси 85 долари за барел, достигнувајќи највисоко ниво во последните четири недели. Причина за новиот раст е ескалацијата на тензиите меѓу САД и Иран во Ормускиот Теснец, што повторно ги зголеми стравувањата од прекин на глобалното снабдување со нафта – објави Ројтерс.

Брент во вторникот се тргуваше околу 84,8–85 долари за барел, додека американската WTI нафта се приближи до 80 долари. Пазарите реагираа по обновените американски воени активности и повторното воведување блокада на иранскиот извоз, што ја врати геополитичката премија во цената на нафтата.

Дополнителна неизвесност предизвика и најавата на американскиот претседател Доналд Трамп за можен надомест од 20% за товарите што минуваат низ Ормускиот Теснец, како дел од, како што рече, обезбедувањето на безбедноста на една од најважните светски енергетски рути. Аналитичарите оценуваат дека засега нема јасни детали како би функционирала ваквата мерка и дали воопшто ќе биде спроведена.

Според пазарните аналитичари, секое дополнително нарушување на пловидбата низ Ормускиот Теснец може да предизвика уште посилен раст на цените, бидејќи низ овој морски премин поминува значителен дел од светската трговија со сурова нафта.

Цените на нафтата пораснаа за повеќе од четири проценти