Македонскиот кошаркарски клуб Навико Академија ФМП го забележаа првиот пораз во балканското кошаркарско натпреварување од Галил Елион со 82:102.

Нашиот претставник беше рамноправен ривал во првите 10 минути од играта. Во првата четвртина домашните кошаркари имаа минимална предност од 20:19.

Во вторите 10 минути Израелците започнаа да го демонстрираат својот квалитет . Фаворизираниот противник заигра многу подобро, особено во фазата на нападот, реализираше дури 34 поени, за двоцифрено водство на паузата од 42:53.

Во уште посилно темпо продолжија гостинските играчи, во третиот период ја обезбедија разликата која им беше доволна за мирен финиш. Стигнаа до уште поголеми 54:79, па останатиот дел од мечот беше рутинско одработување на работите на паркетот. Во завршницата делница екипата од Кисела Вода беше подобра (28:23), само доволно колку да се ублажи поразот.

Били Ајви со 19 поени беше прв стрелец во поразените редови, Крстајиќ уфрли 16, а двоцифрен број на кошеви имаа уште Оливер Двојаковски (13) и Лука Стојановски (12). За Израелците доминираше Мошкович со 17 поени.

Моментно во групата „А“ води Хапоел Галил Елион со четири бодови, ФМП Академија три, по еден Куманово и Балкан, а без бодови Лукоил Левски и Макаби Хаифа. Следен ривал на Навико Академија ФМП повторно ќе игра со израелска екипа, на 30 ноември гостува кај Макаби во Хаифа.