Германската метропола Берлин ќе им дозволи на муслиманските учители да носат шамии, потврдија властите, пренесува „Анадолу“.

Марамите на главата и носењето верски симболи од страна на наставниците ќе бидат општо дозволени и може да се ограничат само во поединечни случаи ако тоа претставува опасност за училишниот мир, соопшти берлинскиот оддел за образование, во официјалното писмо испратено до директорите на училиштата.

Според актот за неутралност на Берлин, кој ги спречува државните службеници да носат религиозна облека и симболи, на наставниците во градот им беше забрането да носат шамии од 2005 година.

Но, неколку судски пресуди во последниве години нагласија дека целосната забрана за носење шамии претставува дискриминација и ја нарушува верската слобода загарантирана со уставот.

Одделот за образование, млади и семејство на Сенатот им порача на директорите на училиштата дека треба да ги почитуваат неодамнешните судски одлуки.