Во шаторската населба „Ќациленд“ на платото пред Народното собрание во Белград, рано утрово се случи инцидент во кој еден маж беше нападнат со нож. Припадниците на итната полиција реагираа брзо и го уапсија 27-годишниот Д.П. осомничен за нападот, објави Н1.

Според Министерството за внатрешни работи, нападот се случил околу 4:10 часот наутро, кога осомничениот го избодел 37-годишниот учесник на протестот во горниот дел од бутот. Повредениот мажс е лекува во болница.

„Припадниците на итните служби на Министерството за внатрешни работи, ангажирани во обезбедувањето на јавен собир на платото пред Народното собрание, го уапсија Д.П. (27) поради постоење основи на сомнение дека сторил кривично дело лесна телесна повреда“, се вели во официјалното соопштение.

На напаѓачот му е одредена мерка притвор до 48 часа. По истекот на тој рок, тој ќе биде донесен во Првото основно јавно обвинителство во Белград за понатамошна постапка, заедно со кривична пријава.