Белгиските обвинители отворија истрага за можна вмешаност на белгиски државјани во „снајперски сафарија“ за време на војната во Босна.

Истрагата на федералното обвинителство следува по постапката што обвинителите во Милано ја отворија минатиот ноември, поради тврдењата дека странски државјани патувале во опколено Сараево и плаќале големи суми пари за да пукаат во цивили за време на конфликтот.

Тврдењата произлегуваат од истражувањето на италијанскиот новинар и автор Ецио Гавацени, кој наведе дека во тие активности можеби учествувале лица од повеќе земји, меѓу кои Белгија, Франција, Германија и Италија.

Според тврдењата на италијанскиот новинар и автор Ецио Гавацени, странски државјани наводно плаќале и до 100.000 евра, а во некои случаи и повеќе, за да пукаат врз цивили во Сараево за време на војната во Босна. Белгиското федерално обвинителство соопшти дека отворило истрага врз основа на информации објавени во медиумите, но засега не открива дополнителни детали.

Покрај Белгија, истрага почна и Австрија. Австриското Министерство за правда соопшти дека постапката е отворена на 25 април против еден австриски државјанин и „против уште едно неидентификувано лице“, поради сомнежи за можно учество во т.н. „снајперски тури“ во Сараево.

Случајот доби пошироко внимание по документарниот филм „Сараево сафари“ на словенечкиот режисер Миран Зупанич од 2022 година. Гавацени подоцна тврдеше дека меѓу наводните „викенд-снајперисти“ имало луѓе од Италија, Франција, Белгија, Швајцарија, Русија и Австрија.

Опсадата на Сараево траеше од април 1992 година речиси четири години. Според официјалните податоци, беа убиени над 11.500 цивили, меѓу нив 1.601 дете, а повеќе од 50.000 луѓе беа ранети.

Австриец и Германец се осомничени дека убивале невини луѓе во „сараевското сафари“