В четврток (6 ноември) од 21.00 часот на Националната арена „Тодор Проески“ во Скопје, фудбалерите на Шкендија ќе го играат својот трет натпревар од Конференциската лига против Јагелонија од Полска.

Досега во лигашката фаза по две кола Јагелонија е на 10 позиција со четири бодови, додека Шкендија е на 20 позиција со три.

Своите амбиции за утрешниот натпревар ги споделија тренерот на Шкендија Јетон Беќири и фудбалерот на тетовската екипа, Арбин Зејнулаи.

– Го анализиравме противникот, зборуваме за екипа која е многу квалитетна, екипа која е доминантна во полското првенство, многу силно и многу физичко првенство. Иако претрпеа порази во последните два натпревари, зборуваме за противник кој мораме многу да го почитуваме и ќе го почитуваме, но обично во Скопје прикажуваме добри натпревари, и во првенството и во Европа. Се надевам дека со максимална посветеност на играчите, почитување на противникот, иако според мене тие ја имаат улогата на фаворит на хартија, верувам дека можеме да излеземе со позитивен резултат на крајот од натпреварот – се зборовите на Беќири.

Зејнулаи вели дека атмосферата е многу добра пред новиот европски предизвик:

– Привилегија за сите нас да ја претставуваме Шкендија и себеси во главната фаза од Конференциската лига. Повеќе или помалку го знаеме противникот, бидејќи ги анализиравме овие денови. Тие се силен тим, тие се физички тим и мораме да им вратиме со многу трка, од каде на крајот верувам дека ќе излеземе со позитивен резултат – кажа Зејнулаи на прес-конференцијата.