Девет фудбалери се уапсени во акцијата на австриската полиција поради сомневање дека учествувале во местење на натпревари.

Уапсените се фудбалери што настапувале во третата лига, а најголем дел од нив се играчи кои потекнуваат од Хрватска и Србија и тоа Марјан Бркиќ, Роберт Брецун, Ратко Буљиќ, Милош Грциќ, Дејан Нешовиќ и Дејан Ќосиќ. Останатите тројца што се приведени се Австријците Филип Петерман, Бартоломеј Куру и Андреас Страпајевич.

Полицијата им упаднала во домовите и им запленила мобилни телефони, компјутери и одредена сума на пари. Истрагата е покрената поради сомневања во местенки на натпревари што се играле во ноември минатата година и тоа откако полицијата била алармирана од комјутерски експерти што го следат обложувањето и резултатите во пониските австриски лиги.

– Највредното нешто во спортот е фер-плејот. Не е важно за кој ранг на натпреварување станува збор и токму затоа одлучивме да ги испитаме случувањата во третата лига и следењето на натпреварите и обложуањето да му го препуштиме на „Спорт радар“. Тие ни укажаа на сомнителните натпревари и резултати – изјави Герхарт Милетич, претседател на Фудбалската федерација на Австрија.