Аудио цеде како сеќавање на Борис Трајковски и посвета на Искра Чоловиќ
Најновото аудио цеде на новинарите на Македонското радио – Радио Скопје Свето Стаменов и Билјана Таневска Спировска, кое деновиве официјално беше објавено, е со наслов „Господ да ја благослови Македонија“.
Изданието ја содржи специјалната емисија „Господ да ја благослови Македонија“, што беше емитувана на програмата на Македонското радио – Радио Скопје на 26 февруари годинава, по повод дваесетгодишнината од загинувањето на поранешниот претседател на Република Македонија Борис Трајковски.
Емисијата, која трае 90 минути и која авторите ѝ ја посветија на својата колешка Искра Чоловиќ, доајен на македонското радио-спикерство, новинар и познат македонски публицист, која ненадејно почина на 14 декември 2023 година, содржи автентични аудиоснимки од говорите на претседателот Трајковски, искази и сеќавања на неговите најблиски соработници и пријатели, како и оригинални новинарски извештаи за загинувањето и погребот на претседателот Трајковски, емитувани во централната информативна емисија „Пладневен радиовесник“ на Македонското радио – Радио Скопје на 26 февруари, 3 и 5 март 2004 година.
Аудиодизајнот на емисијата е на Бесим Кека и Тони Цаневски, а спикери се Искра Чоловиќ и Анета Трпевска.
(Текстот е објавен во „Културен печат“ број 226, во печатеното издание на весникот „Слободен печат“ на 13-14.4.2024)