Фокусот на книгата „Македонски визуелен идентитет“ од Гордана Вренцоска е посочен во поднасловот „Дизајнот како можност за еволуција на традициите од визуелното културно наследство“. Книгата е објавена од „Арс ламина“ и имаше онлајн промоција на 23 март. Идејата за истражување на оваа тема Вренцоска ја добила со нејзиното студирање во Велика Британија.

– Ќе го парафразирам Џорџ Орвел, кој вели дека само тогаш кога ќе се изложите себеси на поразлична култура од вашата, дури тогаш почнувате да ги сфаќате и сопствените убедувања… Како уметник и дизајнер сакав да истражам и да најдам начини како нашата држава да ги искористи своите културни вредности и вековни традиции и на современ начин да ги пренесе во овој глобален свет. Како оваа мала, но интересна држава, да ја направиме компетитивна во денешниот свет – истакнува Вренцоска.

Гордана Вренцоска дипломирала на ФЛУ при УКИМ, на отсекот сликарство со модно креирање. Интердисциплинарните магистерски студии по дизајн ги завршила на колеџот за уметност и дизајн „Централ Сент Мартинс“ во Лондон, како стипендист на престижната британска програма „Чивнинг“. Докторската теза ја одбранила на Институтот за фолклор во Скопје, под менторство на проф. д-р Антоанела Петковска. Реализирала 14 самостојни изложби и учествувала во многубројни групни изложби. Во моментов работи како редовен професор по визуелна уметност и дизајн на Факултетот за арт и дизајн при Европскиот универзитет во Скопје, каде што ја извршува и функцијата декан.

(Текстот е објавен во „Културен печат“ број 74, во печатеното издание на „Слободен печат“ на 27-28 март 2021)