Апликација за мобилен телефон АлкоЧејнџ (AlcoChange), која им помага на пациентите со заболување на црниот дроб да не пијат алкохол може да спаси многу животи. Ова го тврдат истражувачите од Универзитетскиот колеџ во Лондон УЦЛ (UCL) и Слободната кралска болница, кои го развија софтверот, пишува „УЦЛ Њуз“ (UCL News).

Студијата објавена во списанието „ЈХЕП Репорт“ (JHEP Report) покажа дека 57 отсто од луѓето кои ја користеле апликацијата АлкоЧејнџ (AlcoChange) престанале да пијат најмалку три месеци, додека само 22 отсто од оние кои не ја користеле апликацијата редовно, го правеле тоа.

АлкоЧејнџ користи неколку стратегии за промена на однесувањето, вклучително и телефонски алкотестови и персонализирани пораки. Меѓу пораките е и таква која кажува колку пари заштедиле со тоа што не купиле алкохол, но има и слики од најблиските и совети за надминување на кризите и силните желби за алкохол. Алкотестот им овозможува да им покажат на членовите на семејството дека се трезни, а со тоа ја подобрува довербата меѓу нив.

New app aims to help liver disease patients abstain from alcohol | UCL News – UCL – University College London https://t.co/br8Yc7f9Gt @CyberLiver @alcochange @BASLedu @LiverTrust @LoveYourLiver1 @rabataller Novel behaviour change strategy to manage alcohol related liver disease

— Prof Rajiv Jalan (@RajivJalan1) January 5, 2024

Клиничките испитувања довеле до помалку приеми во болница во групи кои ја користат апликацијата, дури и една година откако престанале да ја користат.

– Оваа пилот студија е ветувачка и ако резултатите покажат вакви резултати во поголемите клинички испитувања, ќе ни овозможи да користиме дигитални алатки за поддршка на луѓето кои се обидуваат да го остават алкохолот во своите домови. Има потенцијал да биде многу корисна, бидејќи малку пациенти имаат третман за зависност од алкохол. Заболувањата на црниот дроб предизвикани од прекумерното консумирање алкохолни пијалоци се растечки здравствен проблем во светот и многу ги чинат здравствените системи – изјави д-р Гаутам Мехта, водечки автор на студијата од УЦЛ (UCL).

– Групата што ја користеше апликацијата имаше помалку приеми во болница, што ја намали и смртноста. И се верува дека овие болести убиваат околу три милиони луѓе годишно – додаде тој.

Професорот Раџив Јалан, коавтор на студијата и соработник на УЦЛ (UCL), рече дека е возбудливо да се видат резултатите од студијата.

– Употребата на дигиталната технологија има потенцијал да го револуционизира третманот на пациентите со заболување на црниот дроб бидејќи може да им обезбеди и нега дома – објасни тој.

Сузан (50), од северен Лондон, изјавила за „УЦЛ Њуз“ (UCL News) дека таа е една од првичните учесници во студијата. Како што објаснува, семејното насилство довело до депресија и анксиозност, кои се обидела да ги победи со пиење.

– Завршив во болница бидејќи пиев по три шишиња вино дневно. Искрено, со задоволство се согласив да учествувам во студијата. Она што навистина ми помогна е тоа што апликацијата ми испраќаше слики од ќерка ми кога пиев многу, а тоа ме натера да се држам и да не пијам. Многу е лесно да се користи апликацијата. Ми се допаѓа и алкотестот што се користи – изјавила таа.

Како што додала, откако ја тестирала и престанала да ја користи апликацијата, повторно почнала да пие.