Уапсен Жерар Депардје, обвинет за сексуален напад на две жени
Францускиот актер Жерар Депардје (75) е приведен поради обвинение за сексуален напад, пишуваат француските медиуми.
Според информациите на БФМТВ, Депардје во моментот е на распит во една полициска станица во Париз. Тој беше обвинет од две жени, а нападите, според нивните тврдења, се случиле во 2014 година на снимањето на филмот „Le Magicien et les Siamois“ на Жан-Пјер Моки и во 2021 година на снимањето на „Volets verts“ на Жан Бекер.
Жерар Депардје ја негира вината од првите обвинувања и тврди дека е жртва на „медиумски линч“.
Депардје го бранеа многу истакнати членови на културниот живот во Франција, како и самиот претседател Емануел Макрон.
На 9 јануари оваа година, една жена поднесе тужба против актерот за сексуален напад пред 10 години на снимањето на „Le Magicien et les Siamois“. Жената, која сака да остане анонимна, во моментот на инцидентот имала 24 години. Работела како асистент и го обвинува познатиот актер дека ја допирал по интимните делови, со вулгарни реплики.
Пред тоа, Депардје беше обвинет за слично однесување од 13 други жени. Наводите беа изнесени од актерки, шминкери и продукциски персонал, од кои некои зборуваа анонимно, а наводното малтретирање се случило за време на снимањето на 11 филмови во периодот од 2004 до 2022 година.
На 16 декември 2020 година, актерот беше и официјално обвинет за силување и сексуален напад поврзано со тужбата поднесена од Шарлот Арнолд во 2018 година. Случајот претходно беше отфрлен во 2019 година поради недостиг на докази, но повторно беше отворен во 2020 година, а кривичните пријави беа покренати во декември.
