Од 1.112 испитаници, 63,3 проценти позитивно гледаат на иницијативата „Отворен Балкан“, во која членуваат Северна Македонија, Албанија и Србија, покажуваат податоците од анкетата на Институтот за политички истражувања-Скопје.

Споредбената анализа со анкетата на ИПИС од 2020 година покажува раст на довербата на граѓаните во „Отворен Балкан“, имајќи предвид дека тогаш позитивен став кон инцијативата имале 42,4 отсто од испитаниците, а негативен 39,9 проценти. Оваа година, само 15,9 отсто од анкетираните граѓани имаат негативен став кон „Отворен Балкан“.

Најпозитивен став кон оваа иницијатива имаат најмладите. Кај анкетираните на возраст под 30 години позитивно мислење за „Отворен Балкан“ имаат 70,9 проценти.

На прашањето со која земја во регионот имаме најдобри односи, 56,5 отсто од испитаниците ја посочиле Србија, а по неа следуваат Албанија со 11,3 проценти, Турција и Косово со по 3,3 отсто, Хрватска со 2,6, Словенија со 1,2, Грција со 1,1 и Бугарија со 0,9 проценти.

Од друга страна, како држава со која земјава има најлоши односи, 64,6 отсто од анкетираните ја посочиле Бугарија, а потоа следуваат Грција со 9,2, Албанија со 3,4, Србија со 2 и Косово со 1,2 проценти.

Истражувањето е спроведено за потребите на емисијата „Детектор“, а анкетата на ИПИС е спроведена телефонски во период од 2 до 6 мај.