Американскиот министер за финансии Скот Бесент ја обвини Индија дека профитирала од значително зголемените купувања на руска нафта за време на војната во Украина, велејќи дека Вашингтон ја смета таквата ситуација за неприфатлива, објави Ројтерс.

Бесент изјави дека руската нафта сега сочинува 42 отсто од вкупните купувања на нафта во Индија, што е зголемување од помалку од еден процент пред војната, и го спореди тоа со долгогодишниот купувач Кина, чии удел во купувањата на руска нафта се зголемија од 13 на 16 отсто.

„Индија само заработува пари од тоа. Тие препродаваат“, рече Бесент. „Она што јас би го нарекол индиска арбитража – купување евтина руска нафта и нејзина препродажба како готов производ – се појави за време на војната, што е неприфатливо“, додаде тој.

Американскиот претседател Доналд Трамп овој месец објави дополнителни 25 проценти царини за индиските стоки како казна за купување руска нафта, со што вкупниот дополнителен царински товар откако дојде на власт достигна 50 отсто.

Трамп додаде дека царините на Индија го зголемиле притисокот врз рускиот претседател Владимир Путин да се согласи да работи на прекин на војната во Украина, но дека не вовел слични царини на Кина за нејзините купувања на руска нафта.

Односите меѓу САД и Индија се влошија по царините на Трамп, и покрај месеците предвидувања од страна на американскиот претседател и други функционери дека се блиску до договор со владата на премиерот Нарендра Моди за трговски договор што ќе ги намали царините.

Индија привремено ги укина увозните давачки од 11 проценти за памук до 30 септември, како сигнал до Вашингтон дека Њу Делхи е подготвен да одговори на приговорите на САД за земјоделските тарифи.

Оваа одлука следеше по ненадејното откажување на планираната посета на американските трговски преговарачи на Њу Делхи, која требаше да трае од 25 до 29 август.