Алекс Сааб, познат како „човекот за валкани работи“ на поранешниот венецуелски претседател Николас Мадуро, е обвинет за перење пари. Според американското Обвинителство, тој наводно ја злоупотребил венецуелска програма за социјална помош, пренесува Ројтерс.

Сааб, близок сојузник на Мадуро, бил депортиран во САД од привремената венецуелска претседателка Делси Родригез за време на викендот, потег што таа го нарече „оправдан од националните интереси“.

Депортацијата покажа ново ниво на координација меѓу администрацијата на Трамп и Родригез, поранешна потпретседателка на Мадуро.

Поранешниот 55-годишен венецуелски министер за индустрија, наводно се договарал да поткупува венецуелски функционери и префрлал пари преку американски банкарски сметки за лично да се збогати, тврдат обвинителите. Тој првпат се појави пред федерален суд во Мајами во понеделникот.

Обвиненијата доаѓаат во време кога администрацијата на претседателот Доналд Трамп се подготвува да му суди на Мадуро, кој претходно оваа година бил заробен во Каракас од американски специјални сили.

Објавена фотографија од заробениот Мадуро

Сааб би можел да им обезбеди информации на американските власти за да го зајакнат кривичниот случај против Мадуро, претходно објави Ројтерс.

Во судските документи, обвинителите опишуваат широка шема што започнала во 2015 година, во која Сааб и други лица користеле лажни компании, документи за транспорт и фактури за да проневерат стотици милиони долари наменети за купување храна за Венецуелците.

Почнувајќи од 2019 година, Сааб и неговите наводни соучесници го користеле својот пристап до венецуелската влада, која се соочувала со тешкотии при отплата на странските долгови поради американските економски санкции, за да продаваат милијарди долари вредна нафта под лажни изговори, напишаа обвинителите, додавајќи дека парите од тие продажби исто така биле префрлани преку американски банкарски сметки.

„Овие обвиненија се директен резултат на постојаната посветеност на ДЕА за разбивање на корумпираните мрежи што дејствуваат низ Венецуела“, изјави директорот на американската Агенција за борба против дрога, Теренс Кол.

Ова не е првпат американските власти да го приведат Сааб под обвиненија за поткуп. Во 2020 година тој беше уапсен во Зеленортските Острови, а потоа пренесен во САД.

Претседателот Џо Бајден подоцна му даде помилување во 2023 година, во замена за ослободување на Американци притворени во Венецуела.

Размена на затвореници: Соборец на Мадуро разменет за десет Американци