Со СМС порака ЈП „Градски паркинг“ ќе ги потсетува граѓаните кои заборавиле да го одјават паркирањето дека имаат активна паркинг – сесија на зонските паркиралишта. Корисниците кои испратиле СМС порака за паркирање, по 4 часа и 5 минути ќе добиваат порака- потсетник со содржина: „Потсетување дека имате активно паркирање. За крај испратете порака до 144 144 со содржина S“.

 Оваа порака е со цел да им се излезе во пресрет на корисниците кои паркираат на зони кои немаат ограничено и автоматско исклучување на паркинг сесијата, поточно зоните Ц и Д. Корисниците често, од повеќе причини не успеале да испратат „S“ за крај на користењето на паркинг услугата и со тоа автоматски им се наплаќаше до крај на работното време на паркингот – велат од „Градски паркинг“.

Оттаму апелираат до корисниците навремено да испраќаат СМС пораки за започнување и за стопирање на паркирањето, со што не би се соочиле со непријатности т.е. поставување блокатор на тркало.