Ако не е проблем наместете семафори на двата краја од тротоаров,  насилно претворен во улица и паркинг,  да може пешаци да поминуваат. Нема  смисла да им пречиме на возилава! – се вели во навидум шеговитата објава на скопјанец на Фејсбук во која се прозиваат Министерството за внатрешни работи и Општина Карпош да реагираат.

Станува збор за паркирани возила долж пешачката патека на левата страна на булеварот „Партизански одреди“ пред мостот „Обединети нации“ во насока кон Ѓорче Петров.

Всушност ова е само една слика од градот каде паркирањето е еден од најгорливите проблеми. Паркиралишта нема доволно за да одговорат на потребите на граѓаните, а пронаоѓањето на слободно место за паркирање е како добивка на лото.

Со цветни жардиниери се „брани“ тротоар во Карпош што метални столпчиња не успеаја да го одбранат од паркирани возила

Можеби од тие причини надлежните замижуваат на непрописното паркирање на граѓаните, кои, од друга страна, токму тоа го користат и паркираат каде што ќе стигнат, на тротоари, пешачки патеки, на зелени површини.

И така во круг – општините не обезбедуваат паркиралишта и катни гаражи, казни слабо се изрекуваат, па граѓаните се снаоѓаат.

Притоа, најчесто страдаат пешаците, затоа што во градов за нив и нивната безбедност најмалку се размислува.