Палестинскиот претседател Махмуд Абас изјави дека радикалното движење Хамас би можело да стане политичка партија ако ги прифати принципите на Организацијата за ослободување на Палестина (ПЛО), која го признава Израел и поддржува решение со две држави.

„Хамас сè уште има можност да стане политичка партија ако ги прифати принципите на ПЛО, која го признава Израел, ги почитува неговите меѓународни обврски и поддржува решение со две држави“, рече Абас во интервју за италијанскиот весник „Кориере дела Сера“.

Тој нагласи дека Палестинската самоуправа работи на подготовка на два законски предлози – еден за избори, а другиот за политички партии, и дека парламентарните и претседателските избори би можеле да се одржат во рок од една година од завршувањето на конфликтот.

„Работиме на два законски предлози: еден за избори и еден за партии“, додаде Абас, најавувајќи дека вестите за подготовка на привремен устав ќе бидат објавени во наредните месеци.

Палестинскиот претседател ќе ја посети Италија на 7 ноември и ќе се сретне со папата Лав XIV.