Наместо претседателот Володимир Зеленски, Украина ќе ја испрати премиерката Јулија Свириденко на клучниот форум за обнова на земјата во Полска, во обид да го заштити настанот од актуелниот дипломатски спор меѓу двете земји, објави Ројтерс. Свириденко денеска изјави дека ќе ја предводи украинската делегација на дводневната Конференција за обнова на Украина (УРК), која започнува во четврток во Гдањск, полско пристаниште на Балтичкото Море.

„Нашата делегација има јасна мисија: да обезбеди конкретни договори што ќе ги зајакнат одбранбените капацитети и отпорноста на Украина, а во исто време ќе ја прошират економската соработка со нашите партнери“, рече Свириденко на комуникациската платформа Телеграм.

Таа додаде дека Украина очекува да потпише неколку договори со странски партнери, вклучително и оние за зајакнување на енергетската инфраструктура на Украина, тешко оштетена од руските воздушни напади во текот на изминатата година.

Спорот меѓу Украина и Полска

Одлуката на Зеленски да не учествува на конференцијата дојде по спорот меѓу Украина и Полска околу единица на украинската армија која се именуваше по националистичката единица одговорна за масакрот на Полјаците во Втората светска војна.

Полскиот претседател Карол Навроцки во петокот го одзеде највисокото државно одликување доделено на Зеленски, по што тројца поранешни украински претседатели и други високи функционери ги вратија своите полски државни одликувања.

Зеленски по пошта го врати Орденот на Белиот орел што му го додели Полска

УРК е главен меѓународен настан посветен на обновата на Украина, а неговата цел е да им помогне на полските компании да добијат договори за обнова на земјата по завршувањето на војната со Русија. Сега станува збор и за обид за спасување на односите меѓу двете земји.

„Украинската влада и парламентарната делегација треба да присуствуваат на конференцијата и да ги засукаат ракавите и да сторат сè што е во нивна моќ за нормализирање на билатералните односи“, рече Ирина Герашченко, претставничка на украинската опозициска партија Европска солидарност.

„Ние зависиме од полската логистика, а безбедноста на Полјаците денес е загарантирана со жртвата и храброста на украинските вооружени сили“, додаде таа.

Туск се обидува да ги смири тензиите

Полскиот премиер Доналд Туск, политички ривал на претседателот Навроцки, се обиде да ги смири тензиите велејќи дека владата работи на подготовка на 200 договори за конференцијата и ќе се погрижи работата да биде завршена.

„Зборуваме за стотици милијарди долари, а тоа не се полски пари“, рече Туск. „Тоа ќе бидат и пари што ќе ги потрошат полските компании во Украина по завршувањето на војната. Во интерес на Полска и Украина е оваа соработка да продолжи.“

Конфликтот меѓу Украина и Полска е стратешка грешка која ќе им наштети на двете земји, предупреди Туск