Германскиот тенисер Александер Зверев е последниот полуфиналист на „Австралија опен“. Играчот од Хамбург го совлада Карлос Алкараз, вториот играч на светот, со 3:1 во сетови.

Мечот траеше повеќе од три часа, првите два сета Германецот ги освои убедливо со 6:1 и 6:3. Шпанецот успеа да намали на 2:1 откако беше подобар во третиот сет во тај-брејк со 7:2.

Шестиот тенисер на АТП листата не дозволи овој дуел да продолжи доцна во ноќта па во четвртиот сет ги реши сите дилеми и славеше со 6:4.

За пласман во големото финале Зверев ќе игра против Данил Медведев кој претходно со 3:2 го елиминираше Хуберт Хуркач. До сега Зверев и Медведев се сретнаа 18 пати, Русинот има 11, а Германецот седум победи.

Во второто полуфинале првиот светски рекет Новак Ѓоковиќ од Србија ќе ги одмери силите против Италијанецот Јаник Синер.