Кога малолетно девојче, од дванаесет или тринаесет години ќе дознае дека лажна порнографска фотографија или видео се „намонтирани“ на нејзиното име и презиме и споделувани меѓу еден куп луѓе, може да дојде до голема траума па и самоубиство.

Вака основачот на првата детска амбасада „Меѓаши“ Драги Змијанац, ги коментира последиците кои може да настанат со постоењето на сајбер-насилството како она во групата „Јавна соба“ на Телеграм, каде видеа и фотографии со експлицитна содржина беа намонтирани на малолетнички од Македонија, но и автентични порнографски фотографии беа споделувани меѓу 7.400 членови.

Членовите споделуваа и телефонски броеви од девојчињата, со навредливи сексистички и омаловажувачки коментари.

Змијанац тврди дека детската амбасада уште во петокот го пријавила случајот во полиција.

– Ова е морална деградација на целото општество и децата се препуштени самите на себе. Родителите мора да повнимаваат и воспитанието да ни биде приоритет при градењето личности со висок морален интегритет – ни изјави Змијанац.

Тој апелира општеството да се мобилизира во заштитата од сајбер насилство меѓу врсниците.