Фудбалска Франција е во еуфорија откако Зинедин Зидан најави скорешно враќање на тренерската сцена. Легендарниот Французин, кој последен пат работеше во Реал Мадрид во мај 2021 година, накратко изјави „Наскоро“, одговарајќи на новинарско прашање за неговото враќање.

Француските медиуми веднаш ја подгреаја атмосферата, уверени дека конечно ќе се оствари долгогодишната желба – Зидан да стане селектор на Франција по заминувањето на Дидије Дешан.

Според информациите на RMC и L’Equipe, планот е Дешан да го заврши својот 14-годишен мандат по Светското првенство 2026, а Зидан е главен фаворит да го преземе кормилото на „триколорите“.

Зидан во првиот мандат со Реал освои три титули во Лигата на шампиони по ред, а во вториот додаде титула во Ла Лига и Суперкуп на Шпанија. Иако последниве години се поврзуваше со голем број европски гиганти – Јувентус, Манчестер Јунајтед, Баерн – тој остана без ангажман, чекајќи ја „правата можност“.

Фудбалската јавност во Франција сега со нетрпение очекува дали Зизу навистина ќе се врати таму каде што сите го сакаат – на чело на националниот тим.