Кога зборува Зинедин Зидан, целиот фудбалски свет слуша.

Легендарниот Французин повторно е во центарот на вниманието поради интервју во кое зборуваше за повеќе теми, меѓу кои и за играчот што најмногу го воодушевува во модерниот фудбал.

„Играчот кој во мене буди најмногу емоции кога ќе ја допре топката е Ламин Јамал. Против Интер минатата сезона, на ‘Џузепе Меаца’, правеше што сакаше. Никогаш во животот не сум видел нешто слично,“ изјави Зидан.

Поранешниот стратег на Реал Мадрид и икона на францускиот фудбал веќе претходно го пофали младото чудо на Барселона.

„Тоа второ полувреме против Интер беше неверојатно. Да видиш некој како ја контролира играта и темпото на натпреварот на само 17 години – тоа е фасцинантно. Секогаш ме воодушевува,“ додаде Зидан.

Изјавата на Зидан предизвика големи реакции, бидејќи не го спомна Килијан Мбапе, кој многумина го сметаат за најдобар на светот, ниту својот сонародник Усман Дембеле, актуелниот добитник на „Златната топка“.

Останува впечаток дека за Зидан, талентот и стилот на Ламин Јамал го надминуваат националниот патриотизам.