Жителите на Илинден од денеска можат да аплицираат за субвенции за клима-уреди и соларни панели
Од Општина Илинден информираат дека во тек е Јавен повик за доделување субвенции за набавка на инвертер клима-уреди или соларни панели.
Препорачано
Со јавниот повик се предвидува исплата во висина од 50 проценти од вредноста на набавениот клима-уред или соларен панел, но не повеќе од 10.000 денари по производ.
Право на учество на Јавниот повик има секој жител кој ќе набави инвертер клима-уред или соларен панел од денот на објавувањето на јавниот повик, односно од денеска, а можноста за субвенционирање ќе трае сè до исцрпување на предвидените финансиски средства.
Барањата ќе се разгледуваат по принципот „прв дојден, прв услужен“, а комисијата задолжена за разгледување на барањата ќе има право да изврши увид на лице место за поставениот инвертер клима-уред или соларен панел.
Од локалната самоуправа напоменуваат дека право на субвенционирање може да се оствари само еднаш за едно семејство со иста адреса на живеење.
Сите заинтересирани граѓани дополнителни информации за условите, критериумите и потребната документација можат да добијат во просториите на Општина Илинден или на официјалната веб-страница на Општината.
