Реал Мадрид наскоро ќе се соочи со судска постапка поради одржувањето концерти на стадионот „Сантијаго Бернабеу“, откако судијката Моника Агире де ла Куеста донесе решение за покренување постапка по истрага која траеше година и половина. Во одлуката се наведува сомнеж за можно кривично дело „загадување со бучава“ од страна на компанијата „Real Madrid Estadio“.

Енрике Мартинез, портпарол и претседател на здружението на станари погодени од бучавата од „Бернабеу“, изјави дека „не сме горди што го изведовме Реал Мадрид пред суд“. Иако со децении е навивач и член на клубот, Мартинез нагласува дека проблемот не е во самиот Реал Мадрид.

„Ова апсолутно се однесува на несреќната одлука што ја донесе Флорентино Перез со создавањето на овој бизнис-модел, игнорирајќи дека граѓаните имаат право на одмор и на здравје кое не смее да биде загрозено“, објасни Мартинез.

Жителите повеќе од година и половина се борат против бучавата што ја создаваат концертите на стадионот.

„Кога ние зборувавме дека ова е варварство и дека границите на бучава се брутално надминати, нè нарекуваа ситничари и старци што не знаат што да прават со себе. На крајот сфатија дека станува збор за сериозен проблем“, порача Мартинез.