Ги губиме пациентите во болнички ходници, препраќани од едно во друго одделение и нетретирани за нивните сериозни здравствени состојби, само затоа што имаат и ковид позитивен ПЦР-тест, реагира претседателката на Здружението на приватни матични лекари доктор Лидија Чолакова-Дервишова. Таа во изјава за „Слободен печат“ вели дека нејзина пациентка петти пат во рок од месец и половина добива позитивен резултат на ПЦР-тестот, што ја спречува да добие лекарски третман во болница за нејзината примарна и животозагрозувачка состојба на панкреатитис.

– Можеби има тумор на панкреасот, но петти пат е позитивна и поради тоа наместо на операција, лежеше на Инфективното одделение. Таа пациентка, само затоа што има позитивен ПЦР-тест, не значи дека е за на Инфективно одделение. Ги губиме пациентите на ваков начин по лавиринтите во болниците. Не може да не се прегледува, да не се оперира само затоа што е ковид позитивна – реагира Чолакова-Дервишова.

Според неа, приоритетен за третман е панкреатитисот, а тестирањето за ковид во болниците за пациенти со сериозни коморбидитети треба под итно да запре, зашто ќе изумрат луѓето од други болести.

Матичните примаат без тест

– Пациентката е подуена во стомакот, пет недели ја тестираат наместо да се интервенира хируршки. Тие пациенти матичните лекари ги примаат без никаков тест, така треба да биде и во клиниките за итни случаи – вели Чолакова-Дервишова.

Според неа, негрижа е кога човек со панкреатитис ќе дојде во болница, најнапред да се испитува дали има ковид наместо да се третира панкреатитисот како приоритетен.

– Пациентката слабее, не е за на Инфективно одделение, па го посоветував семејството да ја извади од болница и да потпише дека ќе ја носат на друго место самостојно, во приватна болница или каде што ќе најдат место – вели матичната лекарка.

Директорот на охридската болница, хирургот уролог доктор Горан Балевски, вели дека оперирал и позитивни пациенти на ковид-19 доколку дијагнозата е итна и неодложна. Но, и тој се согласува дека има колеги што не оперираат, па целата нивна работа паѓа на товар на други лекари што се решаваат да оперираат.

– За тој доктор што оперира, ковидот е пекол, а за тој доктор што решава да не оперира, ковидот е рај, зашто ќе го остави пациентот додека да стане негативен. Јас така не постапувам. Сум оперирал и позитивни ако не може да се одложат интервенциите. Малигните болести обично се одложуваат и по три-четири недели, но ако пациентот крвави, никој не треба да гледа дали е позитивен или не. Задолжително му правиме брз антигенски тест пред операција. Има итни дијагнози од прв ред, како крвавења, повреди, трауми, руптури, сообраќајки и нема време за чекање. И кај нас во Охрид оперираме ковид позитивни пациенти ако не може да се чека – вели д-р Балевски.

Има операции што не може да чекаат

Според него, има многу операции што не може да се одложат.

– Зарем две години да одложуваме карцином? Ако тоа го правиме, ќе имаме уште толку карциноми – вели доктор Балевски.

Директорот на ГОБ „8 Септември“, доктор Кристијан Костов, вели дека во оваа болница се вршат операции и на позитивни и на негативни пациенти на ковид-19.

– Имаме посебна операциона сала за ковид позитивни пациенти, покрај вообичаениот оперативен блок, така што хируршките интервенции се одвиваат непречено – вели доктор Костов.

Сепак, минатата недела „Слободен печат“ пишуваше за случајот на 89-годишна жена, која со гангрена на ногата била пратена дома и не била оперирана зашто ПЦР-тестот ѝ бил позитивен. Таа 10 дена чекаше дома да се негативизира, за потоа да биде упатена во Клиничкиот центар во Скопје откако гангрената се влошила.

Минатите недели во повеќе скопски болници и поради заразен персонал, и поради тоа што пациентите биле позитивни на ковид, операциите биле одложени за една недела, дознаваме од разговор со лекари. Меѓутоа, по нормализирањето на капацитетот на медицинскиот персонал и стивнувањето на состојбата, хируршките интервенции биле спроведени.

Хирурзите со кои контактиравме велат дека има пациенти позитивни на ковид што не можат да примат анестезија поради наод на белите дробови.

– На пример, ако има скршеница, светските искуства велат подобро да се причека зашто не се знае како анестезијата ќе делува на ковидот – вели хирург во скопска болница, која истовремено е и ковид-центар.