Украинскиот претседател Володимир Зеленски изјави дека на неговата земја ѝ се потребни дополнителни 25 американски противвоздушни системи за да ѝ помогнат да се спротивстави на руските напади, неколку дена по неговата посета на Вашингтон, објави Укринформ.

Зеленски на прес-конференција објави дека „одржал разговори со одбранбени компании“ за „подготовка на договор за 25 системи „Патриот“.

„Постојат 25 системи што ни се потребни“, нагласи тој.

Зеленски, исто така, рече дека би бил спремен да отпатува во Будимпешта, каде што се очекува средба на рускиот претседател Владимир Путин и американскиот претседател Доналд Трамп, доколку се предложи трилатерален состанок.

Во меѓувреме, Украина, чија гасна инфраструктура е сериозно оштетена од руските напади, може да увезе гас во вредност од околу 2 милијарди долари оваа зима, вклучително и од Европа, САД и Азербејџан, рече Зеленски.

Украинскиот претседател изјави дека американскиот течен природен гас (LNG) може да се снабдува преку терминали во Полска и Грција, додека во иднина Украина би можела да изгради свој терминал во соработка со американски компании, забележува Ројтерс.