Мариус Борг Хојби, 29-годишниот син на норвешката принцеза Мете-Марит од нејзината предбрачна врска со престолонаследникот Хакон, се изјаснил за невин по четири точки од обвинението за силување на почетокот од судењето што го посрамоти кралското семејство.

Облечен во зелени панталони и зелен џемпер, со впечатливи очила и обетки, Хојби не изгледал вознемирено од судењето, известил новинар на АФП во судницата. Тој станал и тивко одговорил дека не се чувствува виновен кога бил прашан да се изјасни за четирите точки од обвинението за силување.

Хојби се соочува со вкупно 38 обвиненија, вклучувајќи и напад врз поранешни девојки и тешко кривично дело поврзано со наркотици, заедно со четири точки од обвинението за силување, поради што се соочува со казна затвор до 16 години доколку го прогласат за виновен.

Тој се изјаснил за виновен за некои од полесните кривични дела.

Хојби бил повторно уапсен во неделата вечер поради сомнение за напад, закана со нож и прекршување на забрана за пристап, па бил во притвор четири недели.

Неговата мајка во текот на викендот беше вмешана во скандалот со Џефри Епстин, откако американските документи открија дека таа била блиска пријателка со осудениот сексуален престапник, кој изврши самоубиство во затвор во 2019 година.

Пред судењето, обвинителот Стурла Хенриксбо рекол за АФП дека кон Хојби „нема да постапува ниту поблаго ниту построго поради неговото семејство“.

Хојби беше уапсен на 4 август 2024 година, под сомнение дека ја нападнал својата девојка претходната ноќ. Неколку дена подоцна, тој призна дека дејствувал „под дејство на алкохол и кокаин по кавгата“, имал „ментални проблеми“ и долго време се борел „со злоупотреба на дрога“.

Четирите силувања за кои е обвинет наводно се случиле во 2018, 2023 и 2024 година, од кои последното по почетокот на полициската истрага. Идентитот на седумте наводни жртви на Хојби не можат да се откријат, со исклучок на неговата поранешна девојка Нора Хаукланд, модел и инфлуенсер која јавно го обвини за физичко злоставување.

Помеѓу летото 2022 и есента 2023 година, додека двајцата биле во врска, Хојби повеќепати ја удирал во лицето, ја удирал со нозете и рацете, ја зграпчувал за грлото, ја фрлал кон фрижидерот и вербално ја навредувал, според обвинението.

Скандалот, меѓу најлошите во историјата на норвешката монархија, нанесе тежок удар врз угледот на кралската палата, иако и понатаму е широко популарна благодарение на кралот Харалд и кралицата Соња. Почетокот на судењето денеска се совпадна со гласањето во норвешкиот парламент за тоа дали да се задржи монархијата. Се очекува задржувањето да биде поддржано од големо мнозинство.

Пресудата против Мариус Борг Хојби се очекува неколку недели по завршувањето на судењето, кое треба да трае до 19 март.

Синот на норвешката принцеза уапсен поради напад со нож во пресрет на судењето за силување