Загадувањето на воздухот најголем еколошки ризик за здравјето на луѓето
Темата на годинашниот Меѓународен ден на чистиот воздух за сино небо, што се одбележува под покровителство на Програмата за животна средина на Обединетите нации (УНЕП), е „Здрав воздух, здрава планета” која ги истакнува здравствените аспекти на загадувањето на воздухот, особено со оглед на пандемијата на Ковид-19.
Генералното собрание на Обединетите нации во 2019 година донесе Резолуција со која 7 септември е прогласен за Меѓународен ден на чистиот воздух за сино небо, со цел да привлече внимание и да ги поддржи акциите насочени кон подобрување на квалитетот на воздухот.
– Загадувањето на воздухот е глобален проблем што влијае на здравјето на луѓето, здравјето на планетата и климатските промени. Мора да се осигураме дека чистиот воздух е достапен за секого, без оглед на географската локација или социо-економскиот статус. За да се постигне ова, светот ќе мора да преземе одлучни, итни мерки, изјави извршниот директор на УНЕП, Ингер Андерсен.
Извор: МИА