Претседателот на СДСМ Зоран Заев денеска го започна караванот на „Најдоброто за мојата општина” во Белчишта во Општина Дебрца, од каде порача дека се обврзуваат да донесат водовод и канализација онаму каде нема, а каде што има, редовно ќе го одржуваат и унапредуваат.

„Ќе продолжат инвестициите во атмосферска канализација, како и реконструкција на улиците во општините, локалните и полски патишта. Токму затоа влогот во инфраструктурата е влог во развојот. Комуналната инфраструктура останува во нашиот фокус, а општините плански ќе ги зајакнуваат капацитетите на јавните градски претпријатија. На тој начин ќе го поттикнеме развојот на секоја општина, без разлика дали е таа мала или голема, урбана или рурална. Секоја општина ни е важна“, нагласи Заев.

За четири години, посочи, изградиле и реконструирале над илјада километри патишта, 60 градинки, 80 училишта, 60 објекти за полицијата, 34 здравствени установи, 20 домови на културата, театри, општински згради.

„Покажавме дека има пари во државата и да растат платите и да се инвестира во капитални проекти. Има пари во државата оти сега тие не одат на споменици, на барок, на палми, жални врби и криминални тендери. Денес секој денар од Буџетот се троши рационално, во проекти кои носат придобивки за граѓаните. Во овие четири години како никогаш досега се инвестираше во патната и комуналната инфраструктура насекаде низ државата. Кога ги димензиониравме инвестициите сериозно внимававме на рамномерниот развој, вложувавме повеќе и финансиравме повеќе проекти во руралните и општините кои цела деценија беа заборавени“, нагласи Заев.

Чистата вода за пиење, здравата животна средина, уредените улици и патишта, градинките и училиштата, смета тој, се огледало на една општина и најважни за тоа какви услови за живот имаат граѓаните.

„Влогот во овие проекти е влог во иднината, затоа што тие остануваат да им служат на граѓаните со години и децении. Затоа како Влада и како општини, сиот фокус го ставивме на овие проекти и зад себе имаме сериозни резултати. И тука во Дебрца се инвестираше во такви проекти кои го олеснуваат животот на граѓаните, а општината ја прават поразвиена. Пробиени се и асфалтирани улици и локални патишта, поставени се водоводи, а преку ТАВ програмата ја финансираме изградбата на фекална канализација со пречистителна станица во село Лешани“, рече Заев.

Извор: МИА