Заев на откривањето на вечното почивалиште на Тоше Проески: Нека ни е вековит споменот за ангелот македонски
Премиерот Зоран Заев денеска присуствуваше во Крушево на откривањето на спомен обележјето на Тоше Проески.
„Од денеска натаму имаме вечно почивалиште и спомен дом достојни за големината на Тоше Проески.
Тоше никогаш ниту физички, ниту духовно не го напушти Крушево. Таа негова присутност е силна и денеска и духот од песните и споменот на Тоше денеска се дел од препознатливата иконографија за Крушево, полно со историски знаменитости и современи атракции кои го направија градот важна и посакувана дестинација во меѓународни рамки.
Наша обврска останува и понатаму достојно да му се оддолжиме за неговиот придонес со постојано сеќавање на неговите музички и хуманитарни остварувања.
Треба да сме му бескрајно благодарни, да го чуваме неговото дело и да го пренесуваме на идните поколенија, кои гордо ќе го спомнуваат и ќе ги пеат неговите песни.
Нека ни е вековит споменот за ангелот македонски.“, напиша Заев на Фејсбук.
