Заев им ја честита наградата „Мето Јовановски“ на „свиркачите“ Лазаревски и Костовски: Вие сте гордоста на нашето општество!
Премиерот Зоран Заев со објава на својот фејсбук-профил им честита на укажувачите Ѓорѓи Лазаревски и Звонко Костовски за добивањето на наградата „Мето Јовановски” за највисоко признание за долгогодишни остварувања во областа на промоцијата, заштитата и унапредувањето на човековите права.
Заев во објавата напиша дека нивната храброст и нивните вредности осојузени со политичкото и граѓанското мнозинство беа силен удар врз недемократските окови на режимот и, како што вели, го започнаа патот кон ослободувањето на нашето општество.
– Оваа нивна жртва ги поставува високо на пиедесталот моралот и одговорноста коишто еден граѓанин може да ги покаже. Не би можел да замислам посоодветен и позаслужен избор на луѓе за оваа награда. Ви се поклонувам, вие сте гордоста на нашето општество!, посочува Заев во објавата.
Во 2018 година, Лазаревски и Костовски ја добија наградата за слобода на говор за извонредна храброст и хероизам во алармирањето на граѓаните на Македонија за широкото распространето кршење на човековите права која ја доделува Коалицијата за заштита на укажувачи на ЈИЕ и од Европскиот центар за права на укажувачите. Со ова највисоко признание за остварувања во областа на промоцијата, заштитата и унапредувањето на човековите права, денеска во Собранието на Република Северна Македонија беше одбележан Денот на човековите права.
