Во тек е сезоната на вирусни и бактериски инфекции, кои со себе носат многу непријатни нуспојави, како што се воспаленијата на грлото.

Многумина, поради болки во грлото, прво ќе побараат помош во аптека и ќе посегнат по пастили или спрејови, но бројни се и оние коишто поддржувачи на домашните методи за санирање на споменатиот здравствен проблем.

Ако сте во втората група, тогаш мора да се запознаете со сите предности на белиот слез.

Белиот или питом слез (лат. Althaea officinalis) е повеќегодишна билка од семејството на слезот која може да порасне до 150 сантиметри во висина. Латинскиот назив на билката се однесува на нејезините лековити својства.

Белиот слез припаѓа на родот althaea, чие име доаѓа од зборовите althainein (лекување) и althos (лековито средство).

Најлековитиот дел од белиот слез е неговиот корен од кој се прави чај. Оваа напивка со векови се користи како средство за ублажување на воспаленијата во грлото, а помага и кај последиците од бронхитис и разни белодробни заболувања.

Студија од 2019 година покажала дека коренот од бел слез може да понуди брзо олеснување на симптомите поврзани со респираторните состојби. Тоа е затоа што коренот од белиот слез помага во изградувањето на заштитна обвивка што ја обложува слузокожата на устата и грлото, со што се намалува иритацијата и отокот.

Исто така, може да ги намали симптомите на сува и иритирачка кашлица.

Неговиот корен ја ослободува насобраната слуз во носот, грлото и белите дробови за полесно да се искашла.

Поради оваа причина, чајот од бел слез се препорачува како природен лек за воспаление на грлото.

Рецепт за чај од бел слез

Две лажици сув корен од бел слез прелијте ги со 2,5 дл млака или ладна вода.

Оставете го да отстои барем еден, идеално два часа, за да се формира доволно слуз.

Потоа, малку загрејте го чајот. По желба, можете да додадете мед.

Несакани ефекти

Коренот на белиот слез веројатно нема да предизвика нуспојави кога правилно се користи. Повеќето истражувања покажуваат дека луѓето имаат многу низок ризик од несакани реакции.

Меѓутоа, во ретки случаи, луѓето може да бидат алергични на коренот од бел слез. За да проверите дали имате алергија на кожата, можете да нанесете мала количина корен од бел слез на внатрешниот дел од лактот. Ако не се појави реакција во рок од 24 часа, може да се користи и на други делови на кожата.