Судејќи според објавите на Општина Аеродром на социјалните мрежи, оваа општина треба да блеска од чистота, со негувано зеленило и уредени паркови.

Веќе неколку месеци наназад, од Аеродром речиси секојдневно информираат и споделуваат фотографии како нивните комунални работници метат по улиците, како косат трева и ги празнат кантите со отпадоци.

И во последната објава поврзана со косењето трева, оттаму велат дека комуналците се секојдневно на терен и се грижат за околината.

Нашиот Аеродром е препознатлив по пространите тревници, убавите паркови, големиот број детски игралишта и современите спортски терени. Екипите на ЈП за Комунални дејности на Општина Аеродром секој ден се на терен и се грижат за секое катче. Животната средина е нашето заедничко богатство, да ја чуваме и да ја негуваме за сите нас, за нашите деца, за идните генерации – напишаа од Аеродром на Фејсбук.

Но, оваа нивна „радост“ околу одржувањето на јавните површини низ општината не ги споделуваат токму оние за кои се наменети – жителите на оваа Општина.

Дел од нив сметаат дека Општината не треба да се фали со нешто што и е секојдневна обврска, како што е косење трева или собирање отпад, додека други тврдат дека ваквите објави се „алиби“ за тоа дека малку се сработува од она што е ветено.

Некои од жителите оценуваат дека всушност општината никогаш не била волку запуштена и нечиста.

Катастрофа е низ цела општина Аеродром, само во одделни мали делови е средено, сѐ друго е крш….Во нашиот најголем и најубав парк Бели парк позади „Лук оил“ помеѓу ниските сини згради е вистински хорор.. Градоначалникот може да прошета да ја разгледа населбата, а не само на исти места да се коси, да се чисти, да се средуваат патеки и да се слика – коментира жител на оваа општина на Фејсбук.

Камиончето за ѓубре ги празни контејнерите и кога е најголема гужва во парк – морало така да биде!

Некои од граѓаните посочуваат дека е неопходно да се осветлат темните точки низ Аеродром, да се засили чистењето на населбите и да се заменат скршените корпи за отпадоци.

Направете увид и на детските игралишта, на пример, во очајна состојба е игралиштето познато како печурка – се предлага во еден во коментарите под официјалите објави на локалната самоуправа.

Граѓаните посочуваат и конкретни локации каде комуналците треба да се фатат за работа.

Особено е нечисто во Стар Аеродром, околу „Меѓаши“. За чудо, тука е и пунктот на „Паркови и зеленило“. Неискосено, ѓубре насекаде, искршени контејнери, еден контејнер за 4 згради (над 300 семејства)… Уште ли да набројувам! Дефинитивно сме најнечист град во Европа!!! Најдете решение! Веќе нема оправдувања! Доста беше! – реагира еден од граѓаните.

Фотографиите што ги споделува Општина Аеродром многу се разликуваат од оние на граѓаните. Но вистина е дека за она што се редовни обврски на општинските служби нема потреба да се информира, а не пак секојдневно, особено по многубројните забелешки од жителите кои сигурно стигаат и до „увото“ на општинарите.

И ова не важи само за Општина Аеродром, туку и за сите други локални самоуправи кои ги сликаат активностите што им се во пописот на редовните обврски.