Возач неуспешно се обидел да помине со својот автомобил преку подвозник со насобрана вода поради интензивните врнежи во Тетово, информираат од Центарот за управување со кризи (ЦУК) по пријавата за овој настан во населбата Дарданија во близина на подвозникот кај полигонот.

Од Територијалната противпожарна единица Тетово информираат дека веќе неколку часа се интервенира на тоа место.

– Водата се испумпува со две пумпи, две противпожарни возила и со помош на четворица пожарникари. Но, бидејќи врнежите од дожд не прекинуваат, интервенцијата се одвива повеќе часови. Наша екипа ќе биде тука сè додека не се отстрани насобраната вода – информираше командирот на ТППЕ Тетово, Авни Амети.

Од ЦУК апелираат до граѓаните да внимаваат и да ги почитуваат упатствата од надлежните служби.

– До населбата Дарданија постојат две алтернативни улици кои граѓаните можат да ги користат за непречено извршување на своите секојдневни обврски додека трае расчистувањето и нормализирањето на состојбата – велат од ЦУК.

Од Јавното комунално претпријатие за водовод и канализација „Шар“ информираа дека и нивни екипи се на терен за време на врнежите од дожд, интервенирајќи на места каде се собира поголема количина вода.