Вотфорд го отпушти Хрватот Славен Билиќ
Хрватскиот стратег Славен Билиќ доби отказ во Вотфорд, а на негово место дојде Крис Вајлдер.
Билиќ од англискиот второлигаш доби отказ откако помина помалку од половина година на клупата. Причина за отказот се лошите резултати, тимот се наоѓа на деветото место по 11-коло во првенството, додека амбициите беа пласман во Премиер лигата.
Во англискиот Чемпионшип првите две екипи директно обезбедуваат место во Премиер лигата, додека екипите од третата до шестата позиција играат плеј-оф. Билиќ никако не успеа да ја поправи формата на својот тим кој во последните осум првенствени натпревари победи на само еден.
Газдата на Вотфорд Џино Поцо е познат по тоа што често ги менува тренерите, па така Билиќ беше 17-тиот тренер на овој тим во 10 години. Од друга страна, Вотфорд за Билиќ беше седми клуб во кариерата, претходно ги водеше Локомотив Москва, Бешикташ, Вест Хем, Ал-Итихад, Вест Бромвич и Пекинг Гуан.