Милијардерот Илон Маск „тивко“ ги напушта плановите за основање нова политичка партија, објави „Волстрит џурнал“, повикувајќи се на извори.

Според весникот, Маск им рекол на соработниците дека сака повторно да се фокусира на своите компании и не сака да ги загрози односите со клучниот политички сојузник, потпретседателот на САД Џ.Д. Венс.

Маск претходно ја презентираше идејата за „Американската партија“ во јули, по јавниот спор со американскиот претседател Доналд Трамп во врска со даночната политика и трошењето, објави „Ројтерс“.

Сепак, планот за формирање на партијата, според весникот, е на чекање со цел да се спречи политичка поделба во рамките на републиканското крило кое го поддржува Венс.

На својот профил на „Икс нетворк“, Маск го коментираше извештајот, кратко велејќи: „Ништо што го кажува „ВСЈ“ не треба да се сфати како вистина“.

Според весникот, Маск и неговите соработници им сигнализирале на луѓе блиски до Венс дека милијардерот може финансиски да ја поддржи евентуалната претседателска кандидатура на Венс во 2028 година.

Во 2024 година, Маск потрошил речиси 300 милиони долари поддржувајќи го Трамп и другите републикански кандидати. Основачот на „Тесла“ и „СпејсИкс“ беше назначен и за раководител на новоформираниот Оддел за владина ефикасност во рамките на администрацијата на Трамп.

Во деловната област, акциите на Тесла паднаа за повеќе од 18 проценти оваа година, откако компанијата го објави најлошиот квартален резултат од продажбата за повеќе од една деценија. Ројтерс не можеше независно да ги потврди информациите објавени во Волстрит џурнал, а Тесла и Белата куќа не одговорија на барањата за коментар.